“”مفتاح السعادة”” بقلم /أمل أمين الخولي
ياللي بتسأل عن سر السعادة
وإزاي تكون الدنيا رايقة
وطعمها سكر زيادة
كفايانا منها ومن مرارها
بطلنا نشرب قهوة سادة
لفيت ودُورت الكون أدور
وأقول يا فرحي إمتى تظهر؟!
لقيت طريق بابه مسنكر
وقالوا مفتاحه تقيل
قُمت ساحبُه بدون ما أفكر
وقولت بس.. هو مفتاح السعادة
أيوه حِمله تقيل صحيح
غير أي مفتاح تاني عادة
وقالوا لازم تفهمه علشان يطاوعك
ويفتح قصادك كل أبواب الإرادة
قابلني باب وبكل عزمي رُحت فاتح
لقيت طريق وناسه ياما
اللي فاشل واللي ناجح
وقالولي روح طبطب ودادي
هيروقوك وهتبقى فالح
قولت عادي دا جبر خاطر
من يومي بستحمل وطيب
فِرحوا أوي وقالولي شاطر
ومن ورايا يعيبوا فيا
ويقولوا بيحب المناظر
أراضي دا.. التاني يزعل
أجري أصالحه وأداوي جرحه
يسوق تناكة ..آل ويتقل
لقيتني ببكي يوماتي حظي
ما شوفت فرح ولِسّاني ناطر
وقفت وف نص الطريق
لا بقيت أميز دا عدو ولا صديق
الكل واحد ف الملامح
بس النفوس خفاياها غير
حسيت كده بخنقه وضِيق
ناداني صوت هادي وحنين
قالي: يا ابني
لا تبقى صعب ولا تبقى ليِّن
خليك ف نفسك وارضِي ربك
صدقني عمره ما راح هيعجب
إن كنت قاسي أو هوين
مفتاح سعادتك جوا نفسك
افرح وكبَّر
طنش وعيش
دي دنيا فانية ومتساويش