بطاطس ” كتب/ إميل لبيب
كلبنا المدلل.. المدلل قوى
اللى بيعمل مابداله من غير ما يقدر حد يكلمه…
وخصوصاً انا
تخيل يا مؤمن يبقى مش محقق لى طموحى الذكورى فى اقتناء كلب.. ويعند معايا ومقدرش اكلمه… نقول ايه؟
حُكم الأغلبية
مش دى الفكرة الرئيسية اللى بكتب عنها … بس برضه مرتبطة ببطاطس.. تحديداً
صوت بطاطس
اللى يسمع صوت بطاطس من غير مايشوفوا يظن انه حاجة ايه كده.. ياما هنا وياما هناك…
وعلى رأى حد كان سمع صوته واول مره يشوفه:
” افتكرناك وحش “
صوت بطاطس الجهورى المتكرر المستمر لا يعبر عن شئ سوى خوفه الشديد جداً… جداً
وكثره نباحه محاوله منه لتصدير فكرة عن نفسه مش حقيقية، او على الاقل بيحاول يبعد الاذى عن نفسه.
ده عكس عنتر.. وهو كلب جدى اللى عاصرناه واحنا صغيرين ومكناش بنسمع له صوت، لدرجة ان البعض افتكره مش بيعرف يهوهو
عنتر كان له سمات وصفات اقل حاجة تتقال فيه الدور القديم بتاع الست:
” واثق الخطى يمشى ملكاً “
هو عارف نفسه هو ايه كويس
ومش مضطر يثبت لأى كلب هو مين… ولا لأى إنسان طبعاً
الثقه بتمنح عنتر النظره اللى تسمح له ” تسمح لعنتر ” يشوف اللى قدامه بناء على إمكانياته وقدراته ” امكانات عنتر طبعاً ” مش إمكانيات وحجم اللى قدامه
علشان كده كان كل اللى بيعمله عنتر لما يحس ان فى شئ مش طبيعى يقف متحفز ويرفع ودانه وينصت، ممكن يقرب ويستطلع وبعدها يرجع ينام تانى مستنى أى جديد ممكن يَجِد على الأحداث اليومية
لو قارنا بين موقف بطاطس واللى كان بيعمله عنتر
هانلاقى اللى ظاهر فى الصورة اكثر هو بطاطس بصوته العالى وحركته الكتير
لكن نلاقي التأثير والتواجد المحسوب والفاعليه هو عنتر الصامت صاحب الحركة التقيلة النادرة.
مع فارق التشبيه واحترامنا للإنسان ووجوده المكرم من قبل الله سبحانه وتعالى
مع ان اللى ربى حيوانات اليفه يدرك ان لها صفات نتمنى أنها تكون عندنا كبنى ادمين.
صاحب الصوت العالى استخدم حيلة نفسية بتنطلق من مبدأ
” المبالغه فى الشئ دليل على افتقاده “
الخوف
عدم الثقه
الهجوم غير المبرر
تصدير صورة قبيحة عن الآخرين
المبالغه فى تجميل الصورة الشخصية والحديث عن الذات والانجازات السابقه
زى ما بنعمل فى بعض الاحيان ونحكي عن تاريخ الفراعنه وحضارتهم واللى عملوه…
طيب ودلوقتي ايه اخبارنا؟
علشان كده نجد ان أى محاولة لإثبات الذات بالكلام او التنظير بدون عمل فعلى حقيقى، نجد انه احد دلائل افتقاد الثقه وضعف موقف صاحبها.
ونرجع للقول المأثور:
أصحاب أفعال لا كلام…
والكلب النباح مش بيعض
علشان كده وفى آخر يوم فى السنة وده المقال الأخير فيها…
سيب اللى يقول يقول
المهم ادراكك لنفسك ايه!!
واعتبره يا سيدى زى بطاطس
مع ان بطاطس جميل وحنين
كل سنة والجميع بخير