مات إحساسي .للشاعرة/حنان فاروق العجمي
قولوا لعين الشمس ماتحماشي
كفاية إللي شُوفتُه ف عُمري ومآسي
ومهما قادت نار مات فيَّ إحساسي
عدَّى القمر ع الكل وبزهوِتُه طل
إلا شبَّاكي مَر وقال ناسي
وطعم المُر رقص ف الطَّل
وجاني يِرِن أجراسي
ودموع ما رِضيِِت تِوَدَّعني
كانت كل جُلَّاسي
فَضَحِتني ابتسامة عيون عطشانة للفرح
وقالت متصدَّقوش دي بتآسي
والقلب لا ف يوم انشرح
وطَرح الظلم غطَّاني
من ساسي لراسي
وانشَرَخ إزاز مشاعري
بكِي حرفي وانجَرَح
بَرَق وميض العسل
نَقَّط على سطور كُرَّاسي
وكلام يجيب كلام
وحكاية تآنسني
وقصة حِبر وغرام
وقرايَة وعلام
ومِنَّك آه يا زمان
ياللي بتملالي كاسي
ولِسَّه إيه شايلِّي كمان
دا الحزن بقالُه عنوان
وضيف عندي أساسي
وصاحبني جرابي المليان
بصفحات قلوب خُدَّام
راعين للقهر والغيام
لكن قلمي مش ندمان
وهيكشف كل من عادى واتمادى
ووقت الشدة كان هربان
وإللي اتغطوا وعملوا نيام
وانا بتكلِّم كلام ف الهوا رايح
وقامت ما قعدت الدنيا
ودبحوا الدبايح
وياما وجَعٍت رسايل
وعَلَم النصر رفرف وكان طايِح
ما خلَّى حد إلا ما أخد ألم
وعَلٍّم على وشوش وفضايح
وقاعدة بسمع الصدى
وحواليا عيون العِدا
بيراقبوا قرطاسي!
وتفانيَّ وتفانيني وإخلاصي!
أصل بيان الحق صنعة
وتخاريف خيال شاعر وقفٍت دماغُه!
بيلخبط ف الأسامي وناسي!
