مين هيسأل؟! .للشاعرة/أمل أمين الخولي
عادي أمَّا تبعد
مين هيسأل أو هيزعل؟!
طب إيه هيحصل؟!
هل حد فاكرك يا ترى؟!
عادي غيابك أو حضورك
لونه باهت.. صوته خافت
ما كفايه دوشه وشوشره
ليه العشم قاتلك أوي
وواخدك بعيد؟!
رايح وجاي ليه عليهم؟
وكأنه بيتك من جديد؟!
ما تفوق وتصحى
هو إيه اللي جرا؟!
كانوا حبايبك
هو صحيح
كان شكلهم بيقول كده
لكن باعوك
يا لعبه تافهه صغيره
إوعاك تقع ولَّا تخيب
وتجيب ورا
وبتجري تسأل؟!
وكمان هتعتب؟!
كل كلامك عندهم
رده عليك كان بالسكوت
وميعرفوش إن سكاتهم
كان لقلبك هو علقة موت
خلاص خلصنا .. بطل نواح
دي قصة عادي مكرره
أنت سراب.. وبواقي أوهام
أنت خيال.. أو كسر حطام
على أنقاضك أنت
تركب وتعلا كتير أحلام
إلا حلمك يا غبي
عمره ما يكمِّل .. إجري استخبى
دا أنت ملطشة الجميع
بلاها قلة قيمة
وكفاياك بقا مسخرة
