فراغ ” بقلم /مجدي بدر
جملة شهيرة كلنا بنقولها ” الوقت كالسيف إن لم تقطعه قطعك”” كل لحظة تمر من عمر الإنسان دون أن يستغلها فى فعل أمر حسن فهي عليه و ليست له . أما الفراغ فله مرجعيات مثل العجز والكسل و التكاسل .
كل منا يرى فراغه بطريقته .و هناك من يضع أهدافاً لحياته ويبدأ فى تحقيقها وهنا يتم التخلص من هذه المشكلة.مين بيحس أنه لديه وقت فراغ ؟ من لا عمل له و هنا مش المقصود بالعمل ( الشغل فقط ) دي إحنا لما بنشوف واحد فاضى بنقول له ( اعمل لك حاجة مفيدة ) قراءة . رسم .كتابة
شخبط أى حاجة
والكلام هنا هيكون على الطلاب والشعور بالملل والفراغ في العطلات الرسمية بعد الإنتهاء من الامتحانات النصفية و الختامية وهنا دورنا إحنا أولياء الأمور نديهم خطة سريعة لإدارة الوقت ليستثمروا وقتهم
اشتراك بمعسكر كشفى و منها يتعلم القيادة حتي لو مش هيكون قائد على الأقل يقدر يقيم عمل القائد ،الاشتراك بنشاط الأندية الرياضية والاجتماعية و حلقات العلم الموجودة تحت مسمي كورسات .
لكي لا يقعوا في مشكلة وقت الفراغ و ما له من سلبيات .
صدق رسول الله صلى الله عليه وسلم حين قال: (نعمتان مغبون فيهما ابن آدم، الصحة والفراغ) .
–جرب تحضر محاضرات أو ندوات و هنا هيحصل متغير قوى هيصدمك و أنت وراحتك يا تتقبل الصدمة يا تقاوم .
و هقولك طلب ( سمعنا صوتك ) دي الجملة اللى بيبدأ بيها الحوار و المناقشة و الثراء المعرفى أنت هتتكلم و أنا هرد عليك و هيبقى فى رأي و رأي آخر . و دي مع فتح باب النقاش و هتتعلم حاجة جميلة هي النظام . جرب ترفع إيدك و تطلب الكلمة و لو متكلمتش جرب تاني و ثالث هتيجي فرصتك عشان تنطلق .
– تابع وسائل الإعلام تليفزيون وراديو و ابعد لو قدرت عن الكمبيوتر و الإنترنت لأنهم كانوا واخدين المساحة الأكبر من الوقت افصل منهم شوية و هترجع تاني لا تقلق
– الزيارات: زيارة الأماكن الدينية التاريخية – زيارة الأصدقاء والأقاربدي هيعمل جو من الألفة و المحبة بس ضع لنفسك قانون للزيارة اقفل تليفونك و سلمه على باب الشقة عند قرايبك و استلمه و أنت ماشى و ممكن تعرض عليهم الفكرة بطريقة مقنعة إنهم وحشينك و عاوز تشتغل الوقت كله معاهم هتلاقى محاربين عتاه للفكرة و هتلاقى مؤيدين متصممش إن الكل يعمل زيك و مارس الترفيه والتسلية القديمة بتاعة جيل ٨٠ و أول ال ٩٠ شطرنج و كوتشينة و دومينو و بنك الحظ و ألعاب معتمدة على الورقة و القلم و تنشيط العقل دي كانت متعتنا زمان . كل دي يقدر يريح نفس الإنسان ولا تشعره بالروتين القاتل، وتساعده في إدارة وقته بالشكل الصحيح. لذلك علينا أن نتذكر دائمًا أن الوقت الذي يذهب لا يعود.
القراءة . التلخيص . الدورات . الابحاث كل دي كلمات ممكن تتحول لساعات من الانشغال و الاشتغال . اهتمامات و اكتشافات أولها هتكتشف نفسك و تحس بيها و تبدأ تستمتع بوقتك . سواء فى دراستك او فى شغلك .
انشغالك فى شغلك مش تحليل ماتش و حل سودكوا و هنفطر إيه النهاردة دي كلها حاجات بتحصل بس لازم وقتها يكون بسيط . لأنها لو اخدت منك وقت كبير هتحقق ذاتك إمتي ؟؟
وأنت خارج معاش و تبقى زى ما دخلت زي ما خرجت .
اصنع لنفسك حائط بطولات ذاتية بأفكارك و تأثيرك فى الآخرين و زي ما قالوا عشان تنجح ساعد غيرك ينجح .