لسه بخير ” بقلم/أمل أمين الخولي
لسَّه بخير
ما دام عايش ومتهنِّي
وفُتِّني وحدي من غيرك
هداري الحزن جوَّايا
وأشيل همي
ويمكن برضه راح أغني
وهرضى بكل تغييرك
ولسَّه بخير
عادي انساني واهجرني
وفارق سِكِّتي وبيعني
مسيري أكبر وهتعود
ولنفسي هكون سيَّاف
وأدربها وهتتروض
مهما حنيني يوجعني
أيوه بخير
ولما تحس محتاجني
وشوقك ليَّا يناديلك
وتفتكر السؤال عني
وتخلف ف البعاد ظني
نادي ساعتها على اسمي
هجري عليك وهجيلك
وأقولك إني لسه بخير
وهكمِّل وهتعلم
ومش محتاج دوا لجروح
لازم أعدي ع الأشواك
وأذوق المٌر وأتألم
عشان ف البعد
فارقِت روحي فيها الروح
لكني بخير
عارف ليه ؟!
عشان أنا غير
ومهما تلِف وتدوَّر
عمر ما حد ف حضوره
هيشبهني ف التأثير
فوتني وروح
واوعى تخاف
لسه أنا برضه بدعيلك
وربنا عنده كل الخير
وهبقى بخير