كان بينّا حلم  ” أمل أمين الخولي

كان بينّا حلم  ” أمل أمين الخولي

 

كان بينّا حلم .. 

وافتكرتك فيه معايا 

بتشاركني

قومت ادور ع اللي منك

واللي باقي من ملامحك

جوا مني

لقيته وهم 

كنت أنا راسماه بخيبتي 

ويا غٌشمي

لساك فاكرني ..

لما كان طيفك بقربي

وبين ايديا 

كنت بجري 

افتح له قلبي 

قبل حضني

بس عارف ..

حتى طيفك م البداية 

كان زاهدني

كان بايعني

وكان رافضني 

لكن خلاص ..

أنا فهمت الحكايه

وهي إني .. 

كنت انا بحلم لوحدي

ايوه فعلًا

كنت أنا بحلم لوحدي

طيفك 

كل ما بحاول بحبي احتويه

واحاجي على ضِله بقٌربي

وافتح له طاقة نور 

بطيبتي ويا غٌلبي

كان بيهرب

كان بيبعد

كان بيهجر ويعاندني

وأنا أصلي طول عمري عبيط

شابط ف خيط الود

ومتعلق لأخر خيط

لحد ما ف يوم 

اتفلت من قسوتك

وبالفراق جرح مشاعري 

وهد قلبي

             .. قلبي ..

             .. قلبي ..

قلبي اللي اتبنى 

علشان يحبِك

علشان يوِدِك

علشان يشيد 

ألف حلم 

وألف قلب 

وألف روح  

يستنوا جنبِك

وأنتِ قلبِك أرض بووور

فيه الجفا يملا بحوور

كله قسوه وكِبر وماليه الغرور

ازاي هتطرح أرضه نور؟؟

وأنا كنت دايمًا اللي بدي 

و مش أناني ..

حِلمت بيك ومعاك و ليك

عشانك أنت 

مش عشاني ..

قولي ..

هاستنى ايه دلوقت منك

ولا ايه من الدنيا تاني

     .. خلاص ..

  ..خلاص ..

بعت وفارقت؟

للدرجة دي رخصت وهٌنت؟

اعمل ايه؟

ابكي عليا ولا عليك

ولا على حلم اتدبح ادام عينيك؟

عيش سعيد مع حلمك الحلو الجديد

ما انا أصلي عارفك

فاهمك ودارسك

وم البداية أنا كنت شايفك

وماله يا سيدي 

طول عمري وأنا بتمنى فرحك 

وجوا قلبي من سكات

راح اخبي جرحك

وحقك عليا عشان ف يوم

حلمي كان ساكن ملامحك

ولما فوقت .. لقيتني وحدي 

لقيتني وحدي بدون سيادتك

 

كان_بينّا_حلم 

    لا .. أقصد ..

كان_ليا_حلم