بكره أحلى .للشاعرة/أمل أمين الخولي
لو الأحزان طارحه سنابلها
على أرضي جناين
وتاه فيها شعاع الشمس
وبقا خايف ومش باين
عادي وماله ماهي دنيا
وحظنا فيها يوم معدول
ولازم برضه يوم مايل
وانا قررت أكون راضي
فمش لازم أكون عصبي
وأحل مشاكلي بدراعي
ولا انا مذلول عشان طيب
ودايمًا في النقاش هادي
كله يا خلق هيعدي
لا يفرق مٌر من سكر
خلاص كله صبح عادي
وانا هعدي على سنيني
وألونها بلون صبري
وهرسم بالرضا شامه
وهطبعها على أورتي
ويمكن أمر ع الأيام
واسطّرها بلون جرحي
ووقتها دمعتي هتنزل
ويبان حزني في ملامحي
وغيرتي القاسيه على حقي
وماله يا خلق
دي غيره محموده ياخوانا
ومتهيألي شيء صحي
وهقبل كل أحوالي
مع حبايبي و عٌزالي
وقولوا إنه سلام نفسي
عشان في الحزن
أنا مسلِم
ووقت الفرح
بسكت عادي وببلِم
ولما أغلي
أبان لك كووول ومتبسم
وده تمللي اوي بيظهر
مع اللون الشقي الأصفر
بلون الشمس
لو حنت كده بطّله
ولون أحلام كتيير راحت
وغيرها ضروري تيجي هالّه
وذكرى في قلبي
لسه يا قلبي أنا شايلها
ولو ماكنتش مستاهله
أهو الأصفر بدرجاته
وتكاته وحركاته
بيرسم نور وشمسايه
وغمازه على خدودي
ببسمه ويا ضِحكايه
ودنيا تبان لنا أجمل
وإن شاء ربي تبقى أحلى
