بانوراما فقير ” بقلم / جمال القاضي
عايشين الدنيا
وبلويها شايفينها كتير
مابين فقر وهم
يعدي سريع العمر
واهو عايشين
وتسأل عمرك كام
يكون الرد
محسبتوش
بقالي سنين
وسيبني ياعم انا شايل هم
والفكر بعقلي كتير
والرزق معايا بجيبي قليل
ومن كتر الهم
سهران الليل
فكر يودي وفكر يجيب
ومعرفش الفكر
ياخدني لفين
حتى الصبح بيصحيني
لما يخبط صوت الباب
والديِانة عليه واقفين
واحد منهم يجي يقولي
فلوس الغاز فينها ياعم
كام شهر معانا
محتاج تحصيل
والقسط السابع
يبقى معاهم
وتكون الجملة
منك عايزين الفين
والتاني يقول
فلوس المية
فواتيرها بقالها معايا
شهرين اتنين
من غير تحصيل
اما كهربة البيت
دا لازمه كتير
مرتب شهر ويمكن أكتر
قول شهرين
واحنا يدوب بنشغل لمبه
ومروحة السقف
ف اليوم ساعتين
وباقي الليل
فوق السطح هناك صاحين
والابن كمان هو واخته
اصحى الصبح
يقولوا ساخنين
والام سهرانه معاهم
طول الليل
ولا الدكتور وكشفه الغالي
ولما تروحله يقولك
ياعم الحاج ابنك ده
لازمله ضروري
تعمله سونار
ورسم القلب ضروري لبنتك
وللاتنين كمان تحليل
وترجع بعد الظهر البيت
والأطفال ع الباب واقفين
وبعلوا الصوت ف الشارع
تعالى يابابا فلوس الدرس
دي راحت فين
بتخبيها علينا ؟
ولا شايلها معاك ؟
ومستر احمد
ومس انسام لها عايزين
والأم بأطبقها الفاضية
تخبط فيها وتقول ياابو احمد
الأولاد بيقولوا
هننزل تاني زي البارح
من غير ولالقمة تنزل جوفنا
وهنفضل تاني
ع طول صايمين
ومش فاطرين؟
ترد تقول: هعمل ايه ياولادي
حالنا منيل واديكو شايفين
ويهد جبال ويهد الحيل
وكل مانملك
بعناه البارح واهو عايشين
حتى سؤال الغير عن حالنا
هتلاقي الناس لنا ناسين
ومش فاكرين
والكل تشوفه غرقان ف ديونه
واهو عايشين
وسنين وسنين بتمر علينا
ويضيع العمر ولانعرف فيه
رايحين على فين
وأهو عايشين