أنا مش بموت .بقلم/أمل أمين الخولي
لما يخرس جوا قلبي
ألف صوت
وآجي أدوَّر ع الكلام
يهرب ويجري
واسمعه بيبكي ويصرخ
ف السكوت
ف سألت نفسي:
إيه جرالك؟ قولي مالك؟
فين حروفك وارتجالك؟
قالي:
يحرم ع القلم لو خط كلمة
ولَّا إني أنوَّر ليلي في سمايا ب نجمة
أو إن حِسي أسمعه يدندن بغنوه
وقتها..
هجلد لساني بألف سوط
إزاي نشوف بعيونّا حلم بيتوئِد
والبراءة ف الطرق بتدبح
والأماني بتتجلد
وف التراب دِين ومِلة بيتدّفن
وهو ف عينينا اتولد
طب والتاريخ!
تاريخ جدودنا اللي اتمحى
وكان منقوش ع الحجر
وصورة الحقيقة
اتدّنست واتبدلت
بعد ما رسمها القدر
هما نسيوا لما أسرى المصطفى
دا كله ف القرآن مخطط واتسطر
والمسيح
اللي عاش عمره ف خطر
وقلب عذرا .. أمَّا انفطر
وعلم بلادنا
اللي بإيدينا اترسم
وضهر أمي اللي اتقسم
ودم أبويا
اللي استباحه المعتدي
وحق أخويا
ليه يضيع؟
وإزاي يقولوا إنه ظالم معتدي؟
أنا مش بموت
كل حتة ف جسمي بكرة هتتزرع
وأمي هتحصد من ضلوعي
ألف صوت
أنا مش بموت
دمي زي النيل ف طُهره وف أصالته
لو جف ريقه
طينته علقم للأعادي
وعلى قلبنا
يرطَّب بتمره أو بتوت
أنا مش بموووت
دمعي غالي وكل دمعة
تمنها روح
زي ما بتتعبَّى
أشلاءنا ف تابوت
أنا مش بموت أنا مش بموت
دي البداية مش النهاية
قطر الحياة داير عليهم
والمحطة جايا جايا
لازم تعدي
وعمرها ما تخلف
لظالم أو تفوت
