آسفة يا مرايتي .للشاعرة/أمل أمين الخولي
يا مرايتي يا مرايتي
قوليلي :
إيه إللي جوَّايا اتكسر
غير ملامحي وابتسامتي
ودمعتي ويَّاها حيرتي؟
إيه واجعني وإيه حكايتي؟
بتقولي إيه؟
سمَّعِيني؟
بتقولي قلبي؟
لا… مش مهم
قلبي ياما حقُّه ف الدنيا اتهدر
ووجعه عارفاه
زي سيف عمّال بينحت ف الحجر
ألمي الساعه دي
حاساه أقوى
شايفاه أعفى
زي روحي فاتتني وحدي
وتُهت منها ف قلب منفي
إوعاك تكوني إنتي يا نفسي
إللي بكيانك اتغدر؟
إياك تلومي إلَّا روحك
قومي بإيديكي واكبري
وداوي جروحك
وارسمي ع الشفايف
ضحكة ويَّاها جموحك
واصرخي داخل سكوتك
واخرسي
مهما يملا الدنيا صوتك
م النهاردة اتعلمي
هتعيشي عمرك
تندمي وتتألمي
يا مرايتي حقك
بيعي فيَّا واشتري
كذِّبت صِدقك
ودايمًا عليكِ بفتري
بقول غبية ومُفترية
وبتظهر العيب إللي فيَّا
جيت النهاردة
بعلو صوتي بقولها ليكي
يا مرايتي أنا :
حقك عليا
