جريدة النجم الوطني

- Advertisement -

- Advertisement -

مشنة سعيدة الحلقة 11 نقطة ومن اول السطر بقلم عاطف محمد

0 10

احصل على تحديثات في الوقت الفعلي مباشرة على جهازك ، اشترك الآن.

- Advertisement -

مشنة سعيدة الحلقة 11 نقطة ومن اول السطر بقلم عاطف محمد

_فى ردهة الوحدة الصحية وأثناء سير الدكتور إيهاب وجد رضا وصابرين
كويس إنى لقيتكم لوحدكم ااااا
فيه أيه يادكتور إيهاب؟
الست سعيدة لازم نعملها عملية صغيره(قالها بصوت حزين)
عمليه عملية أيه ؟
احن هاناخد منها عينة
ليه ؟
عندها ورم وهانطمن أنه مش خبيث (كمن ألقى قنبلة ) إن شاء الله (مطمئنا)
ايه!!!
ادعو ربنا أنه يعديها على خير
والعينة دى هاتخدوها هنا (بيأس واستسلام)
لاء فى المستشفى العام، الوحدة هنا إمكانياتها ضعيفة
لم ترد كل منهما وراحتا فى صمت عميق
ولكن تفاجأ الجميع بسعيدة تقف خلفهم وتقول بكل ثبات للطبيب
خدوا العينة إللى انتم عايزنها يا دكتور إيهاب ، ربنا كبير وهو إللى القادر على كل شي بيقول كن فيكون واحنا مافيش بيدنا حاجة
و‏كل شيء بقدر ربنا ، وربنا قسم للواحد سعادته و شقاه و رزقه و عمره، وصحته وعياه واللى ليك هايجيلك سواء خير أو شر هايجيلك على ضعفك او قوتك ،واللى بيكون لغيرك مش هاتخده بقوتك .
كان الرد سحابة أطلقت على الجميع دهشة لا حد لها
إلا رسمية فقد استمعت إلى ما حدث كلمة كلمة ثم توارت تجرى مكالمة هاتفية فى ذلك المحمول الذى قالت أنه هدية من شخص عزيز وفريد جدا

– تعجب كل المتواجدين داخل المنطقة الشهيرة بتجارة الممنوعات والتى يتخذ التجار فيها إجراءات شديدة للهرب من إثبات اى تهمة للاتجار عليهم أن هناك حملة من جانب الشرطة فاجأت الحى ولم يعلم بها أحد ، فلم يستطع أحد سرعة إخفاء معالم التعاطى أو الاتجار سريعا ، كما كان يتم من قبل ،الغريب أنه كان من المفروض القبض على الكثيرين ولكن تم القبض على رجل واحد فقط لا ناقة له ولا جمل ، كل جريمته أنه يتعاطى المخدرات ، انه قاسم اخذته قوة الشرطة أمام أعين الجميع وبسرعة غريبة واهملت باقى الحى وخرجت بسرعة ،ولكن لم تمر سوى لحظات إلا وهجمت قوات كبيرة من الشرطة على الحى بأكمله وتم القبض على معظم تجار الصنف الذين اطمئنوا بأن الحملة الأولى قد انتهت ومرت بسلام ،ولكن عند معاودة النشاط حدث ما حدث ولكن نجا من ذلك فارس باشا ….

– فى داخل نقطة كفر العنب وأثناء انشغال الضباط حسام ، دخل الشاويش حنفى وادى التحية
تمام يا افندم واحنا بنغير الوردية على أرض المنشات وجدنا المدعو فريد واصل بيطلب مننا الخروج من أرضه وورنا عقد الأرض وباسمه..
باسمه يعنى أيه ياشاويش حنفى
ما اعرفش يا افندم انا شفت العقد واتأكدت منه.
رفع حسام سماعة التليفون شريف بيه خد قوة وروح هات لى فريد واصل بسرعة هاتلاقيه فى أرض المشنات ولما يجى سامح بيه يجينى فورا..
وسمع على الجانب الآخر تمام يا افندم
ثم أغلق التليفون…
وانت الشاويش حنفى روح هات حد من بيت قاسم وسعيدة ، أى حد عرفه رضا صابرين أى حد
تمام يا افندم وانصرف بعد تأدية التحية

- Advertisement -

– فى داخل كلية الطب تجمع الطلاب الجدد للتعارف ومعرفة كيفية الدراسة وكل ما يدور حول العام الدراسى الجديد فلم يكن لدى الجميع أى وقت لتضيعه ، فالدراسة ليست بالسهولة وتحتاج الكثير من العناء ، وعلى أحد جوانب طرقات الكلية تبرع أحد الطلاب القدامى بشرح الأمور الطلاب الجدد الذين تجمعوا واستمعوا له بعناية
بصوا يا دكاترة المستقبل هاشرح الموضوع من اوله .
الحكومة عام 2017 طلعت قرار بتعديل نص المادة 154 من اللائحة التنفيذية لقانون تنظيم الجامعات رقم 49 لسنة 1972، لتعديل مدة الدراسة بكليات الطب، للحصول على درجة البكالوريوس فى الطب والجراحة، علشان تبقى 5 سنوات بنظام الساعات المعتمدة، وسنتين امتياز، بدل من 6 سنين وسنه امتياز، بعدها عمل امتحان عام كشرط لمزاولة المهنة،تمام ….نظر له الجميع
فاومأ الكل برأسه (ثم أكمل حديثه)
يعتمد نظام الدراسة الجديد على الدمج بين المقررات العملية والنظرية، بحيث يدخل الطلاب للمستشفيات من السنة الدراسية الأولى ، في الوقت نفسه يدرس الطلاب حسب النظام القديم مواد علمية بشكل نظري زى التشريح ووظائف الأعضاء على مدى 3 سنوات ليسمح لهم بعدها ببدء التطبيق العملي في المستشفيات ، وبكده يحتاج الطلاب أنهم يمضوا سنة كاملة في التدريب العملي قبل ما يخدوا الشهادة وده في النظام الجديد اما القديم كان بيحتاجوا سنتين من التدريب الميداني، وده خلى تطبيق النظام الجديد يحتاج تغيير في المناهج زى دمج لبعض المواد وحذف لمواد تانية كان فيها تكرار لمعلومات جت في مقررات تانيه ، مع العلم أن أخر تطوير التعليم الطبي في مصر كان عام 1911
وهنا سألت رضا الطالب القديم نفهم من كده إن كلية الطب صعبة
رد الطالب القديم
كليتنا أصعب كلية عملية فى مصر
الامتحانات فيها مستمرة لكن الجميل أنك
بتبقى عارف معلومات كتير ماكنتش هاتعرفها قبل رابعة طب وده فى النظام الجديد
فيه ناس بتفكر أننا بنشخص المرض ونكتب العلاج لاء الكلام ده مش مظبوط ومش وقته ، احنا بنعرف المرض وكل شئ عنه ، وبعدين ناخد خبرة تخلينا نكتب العلاج المناسب ،
المهم أننا بننزل للمستشفيات ونشوف الحالات قدام عنينا ، ودى حاجة كويسة
انا شفت مرة مريض عنده مرض اسمه حمى البحر المتوسط ، وكنت درست اعراض وطرق علاج المرض من الدكاترة وده كان نظرى ، لكن شوفته على الطبيعة وقدرت اعرف أكتر، ارجو إنى اكون قدرت أعرفكم حاجات مهمة ولينا لقاء تانى ، وأى حد عايز اى حاجة أنا تحت أمره
ردت هناء شكرا يا دكتور
مع ان ده لسه بدرى لكن لا شكر على واجب يا دكتوره ..
هناء اسمى هناء
اشكركم وعن اذنك عندى محاضرات كتير
شكره الطلاب والطالبات وانفض الجمع
وتبقى رضا وهناء وحدث بينهما تعارف سريع وصارت بينهما صداقة من أول وهلة …
مالك يارضا فى عينك مسحة حزن
لاء مافيش
صحيح احنا صاحب جداد لكن انت دخلتى قلبى وحاسة أننا هانبقى أصحاب طول العمر وشايفاكى مش زى بنات اليومين دول ، مالك بجد
(تنهدت رضا)فى بعض الأوقات ممكن ماتحتجش إنسان يديك شمسية تحميك من المطر أو حر الشمس، أحيانا تلاقى انك محتاج إنسان يتبل معاك او الشمس تلسعه بحرارتها زىك بالظبط ، لأن ساعات مساحة الشعور بتبقى اكبر بكتير من مساحة العطاء
انت حكاية كبيرة ولازم أسمعها من طقق لسلامو عليكم
وعليكم السلام الكلام هايخدنا وننسى المحاضرات نكمل بعدين
تمام ماشى يا دكتوره رضا (ابتسمت وتحركتا إلى المدرج )

– جلس عرفة يراجع جدول محاضراته النظرية والعملية ويستعد بكل قوة لخوض غمار الدراسة حتى يحقق أحلامه واحلام أسرته ، واثناء انشغاله
لو سمحت حضرتك مدرج هندسة منين
(اشار بيده)من هنا بس المحاضرة فاضل عليها ربع ساعة
تمام استنى شوية
تمام انا اسمى عرفة وحضرتك
ايه حضرتك دى ايه الكلام القديم ده ، احنا زمايل مع بعض ممكن تقولى ياهند عادى، مافيش مشكلة
وجد عرفة هند مرحة ذات دم خفيف ذكرته بأخته هنية
لفت نظرها ما يكتبه عرفه هو انت مهندس ولا أديب
ليه بتقولى كده
يعنى من إللى انت كاتبه على الهامش ده
اه قصدك ده ، ده كلام بسيط
ماشى ياعم البسبط وتناولت الكشكول وقرأت
عندما تسقط شجرة يسمع الجميع صوت سقوطها واضحا ،فى حين تنمو غابة كاملة دون اى ضجيج ، فالناس لا تلتفت مطلقا لتميزك بل يركزون جيدا مع سقوطك…
ايه الكلام الجامد ده
ولا جامد ولا حاجة على العموم نشوف الموضوع ده بعدين بينا على المحاضرة
تمام ياانسة هند…
ماشى يا استاذ عرفه
ضحكا ثم ذهبا إلى المحاضرة

-فى مطعم الفندق مرت ساندرا للاطمئنان على سير العمل فوجدت فرج وادهم يعملان بجد وسعادة، فقد اكتسبا ثقة المترددين على مطعم الفندق بعد العمل به بعد تعين والدة ساندرا لهما فى هذه الوظيفة
مساء الخير يا استاذ فرج
مساء النور انسة ساندرا
مبسوط فى الشغل عندنا (ولكن قبل ان يرد رد أدهم )
طبعا ياانسة ساندرا
ماشاء الله نطقك فى العربى بقى هايل
السر فى المعلم هو إللى خلانى اتكلم
عربى كويس
(بشىء من الدعابة)فرج ممتاز فى كل حاجة وخصوصا العربى بيتكلمه كويس ويحسه ويعيشه
ايه هانتكلم كتير ونسبب شغلنا ولا أيه
اه. عند حق يا متر فرج بينا ع الشغل (بجدية مصطنعة) (وهنا تقترب اجاتا والدة ساندرا )
فرج أنت لازم تسافر مصر بعد اسبوع
ليه اجاتا؟
ساندرا الموضوع ضرورى ومهم وسريع
خيم الصمت على الجميع

-فى مكتب الضباط حسام
تمام يا حسام باشا فريد واصل فى بيت قاسم وسعيدة بس….
بس أيه يا شريف بيه؟
وهنا يدخل الضابط سامح
تمام يا حسام باشا كله تمام ،المهمة تمت بنجاح …

تابعونى فى الحلقة 12
لمعرفة سر عودة فرج لمصر
ماذا حدث لقاسم؟
ماهى المفاجأة التى حدثت فى بيت سعيدة؟
وما هى المهمة التى تمت بنجاح؟تعليقاتكم تثرينى….

احصل على تحديثات في الوقت الفعلي مباشرة على جهازك ، اشترك الآن.

اترك رد

لن يتم نشر عنوان بريدك الإلكتروني.