جريدة النجم الوطني
alnigm.com/gif2.gif

لما قالوا اني ام

0 119

الشاعره/سناء قنديل بنت السويس

 

يومها بس عرفت اني قد ايه الكلمه دي غاليه عليه ..
يومها حسيت بالالم والوجع ..
اني يوم زعلتها أو بكلمه ديقتها.. ورديت عليها وقتها ..
وقولتلها خايفه ليه دايما عليه ..
لما قالوا اني ام ..
كل لحظه من حياتي ويا امي شريط يمر .
لما كنت اسخن شويه وتجري بيه في عز ليلي ..
وهي تترجي الطبيب يجيلي .. وهي تبكي بس من خوفها عليه ..
لما قالوا اني ام …
الدموع سكنت عنيه … ايوه الدموع سكنت عنيه ..
لاني وقتها بس عرفت يعني ايه افرق..
بين الحب اللي في عنيها والاسيه
بين القلق والسهر.. و طول النهار تنادي عليه ..
يابنتي ذكري .. يابنتي خافي علي نفسك شويه
لما كنت اقول خلاص مش عوزه ديه .. تبص بعنيها ترضيني ..
وتقولي ارضي بالمقسوم شويه..
تقولي أرضي بقسمتك ده الحياة مش سهله ..
والرضي أجمل هديه..
لما مسكت أيدي وف عنيها بسمه ليا بالحنان بضم ضم
.. ده الرضا يابنتي عباده ..
لما قالوا اني ام ..
وبعد طول الحمل كنت فيها عرفت معني ايه ربي وحملته وهن علي وهن ..
لما قالوا اني ام ..
اتمنيت يامي وقتها في حضنك اناااام وانسي كل سنين الشقا للي انا كنت في يوم جزء منها .. لما تقولي قولي حاضر .. ورد لا ..
لما تقولي قولي حاضر .. ورد اف ..
لما قالو اني ام .. يومها بس خفت اني تروحي مني .. قبل ماترضي عليه وتمسحي سنين الاسيه ..
جريت عليك قبل حتي مضم ابني بين عيوني ..
لقيتك انت ضمه ابني مابين اديكي .. وتقولي اتعلمي ازاي تشيلي ..
لسه بردو بتعلميني وفي مشواري مكمله ..
طيب سمحتي يانن عيني ..
بكل طيب وقلب ام تقول سمحتك من زمان يا ضئ عيني .
__________

اترك رد

لن يتم نشر عنوان بريدك الإلكتروني.