لعلاقات حياتية تكون فعلا أفضل
إعداد دكتور نورا سلطان
وتكون مصدر راحة مش ضغطة ليك
حاول تكمل الكلام ده لآخره..
{١}
لو بتحب حد وحابين تكونوا أقرب
اقضي معاه وقت، أهتم بإهتماماته، فكر معاه بصوت عالي،
أضحك معاه، شد واختلف معاه
شاركه في بعض أنشطة حياته،
اسئله عن مشاعره وتوجهات أفكاره
إتأكد من وقت للتاني
إنكم لسه شايفين الحياة بعنين بعض
لسه حابين تحترموا وجهات نظر بعض
لسه قادرين تفهموا بعض وقادرين تقيسوا الأمور بنفس المقاييس.
من غير كل ده..
مش هتكونوا منسجمين ولا متحمسين لعلاقة أعمق.. لأن
المسافات هتبعد والقلوب هتقفل والإختلافات هتبقي عائق.
{٢}
كونك تزعل أو تغضب أو تكتئب أو تنفعل
ده حقك لإنها مشاعرك.. وقبولي ليها
معناه إحترامي للي حسيت بيه فعلاً لأنه أكيد حقيقى
بس مش لازم الفكرة أو الموقف أو طريقة فهمك للي حصل
واللى سببلك المشاعر دي يكون صح أو حقيقي
ودي حاجة لازم تقبل فيها النقاش والحوار والتغيير
بعد طبعاً قبولي وتفهمي لمشاعرك
علشان نعرف نكمل في علاقتنا
{٣}
مش كل علاقات مكمله هي علاقات صحية ومفيدة
فلترة العلاقات من وقت للتانى صح جداً
البعض بتقرب منه أكتر لأنه شخص حقيقي بيحبك
والبعض هنبعد عنهم لأنهم ببساطة مش بيحترموا الحدود
ولا المسافات أو العلاقة بشكلها ده مش فارقه معاهم
ماتخليش قوائم علاقاتك تتجدد تلقائياً
جددها بنفسك وبوعي
{٤}
العلاقات بين الجنسين دايماً ليها حدود أكبر
وده لطبيعة الرجالة وكمان الستات
فمثلاً الصداقة ليها حدود والزمالة طبعا
يعنى مش كل الكلام ولا نوعية المواضيع
ولا مدد الإحتكاك المباشر ولا فترات الحكي ولا مسافات الإقتراب
ولا حجم التلامس بيكونوا زي علاقة إثنين من نفس الجنس
اختلف معانا أو اتفق لكن ده اللي عندنا في الموضوع ده
{٥}
في العلاقات الطويلة دايماً في مباديء مهمة بتساعد العلاقات تكمل في إتجاه صح
- الثقة مهمة ودي بتتبني مع الوقت ومن حاجات صغيرة ومواقف بسيطة
- الوضوح كمان مهم وده بيحتاج شخصيات واضحة مع نفسها أولاً
مش بسهولة اللي مش واضح مع نفسه يكون واضح وحقيقي مع غيره
{٦}
أغلب العلاقات في أولها بتكون وردية مليانة كلام إيجابى وجميل
بعدها بتدخل مرحلة تصادمية فيها اكتشاف لأمور في كلا الطرفين
وتبدأ بعدها الصدمة
بعد المرحلة دي في اختيار من ٣
- إما بترجع العلاقة أقوى لأنها بتتبنى من جديد
على أرضية واضحة وتقارب واعي - أو يكون الصدام ده نهاية العلاقة مع صعوبة الرجوع
وقد تصل للخصام أو التجريح وتقلب بخناقة - أو تستمر العلاقة بحدود أعلى وسطحية فاترة وصباح الخير صباح النور
{٧}
فى العلاقات نحتاج المواجهة والحسم في أمور
والتغاضي والتجاهل في أمور أخرى
ولمعرفة متى نفعل هذه أو تلك نحتاج إلى حكمة شديدة
{٨}
في ناس من علاقاتك
زي مرايتك بالظبط
خصوصاً اللي بيشفوك كتير
في بيتك أو شغلك
عارفينك على حقيقتك بأقل عدد أقنعة
سيبهم يتكلموا ، أسمعلهم وفكر في كلامهم
ولو اتنين منهم اتفقوا على حاجة
دي لازم تنزل في أولويات جدول التعديلات القادمة عندك
{٩}
في نوعية غريبة كده مش هتقابلها كتير في علاقات حياتك
ناس هتستفزك وهتطلع أسواء ما فيك
هما كده ليهم طريقة وأسلوب وده ممكن يكون معاك انت بس
يعني هما مش كده مع كل الناس
لكن سكتك معاهم طلعت كده
الناس دي ما تهربش منهم لأنهم مفيدين جداً ليك
هيوروك جزء في شخصيتك عمرك ما شفته ولا تخيلت انه عندك
أستفيد منهم وأتعلم من كونك في علاقة زى دي حتي لو مُرهقة
{١٠}
احنا كائنات علاقاتية ومش بنعرف نعيش من غيرها
بس في نوعية كده من العلاقات مهم انها تكون موجودة
وغيابها بيعمل إرتباك داخلي
زي العلاقة مع حد كبير يسند ويرعى ويوبخ ويظبط دوافعك
وكمان العلاقة اللى فيها انتماء لمجموعة
أو مجتمع أو كيان تشعر معاه بالأمان
وكمان العلاقة مع مخدومين بتطلع معاهم بره نفسك وتغسل رجليهم
دي نوعيات علاقات مهم إنها تكون موجودة
لأنها عموماً بتساعد في الحياة