جريدة النجم الوطني
alnigm.com/gif2.gif

قلب ع المعاش

0 304

 

شعر / أحمد رأفت..

العقل طاش ..
ولّد طناش ..
وانا لسَّه على بابك
باحنّ ..
ليوم ما جاش..
عمَّال ادقدق ..
لاجل ما تواربي البيبان ..
أو تفتحي ..
للعاشق اللي ما عمره عاش..
من غير سفر ..
بين العيون
أو عزف على وتر الجنون
أو زقزقة..
زي الطيور الهايمة
على كل الغصون
دقدقت على بابك سنين
غرقان حنين
وشربت ياما كاسات مرار
والقلب برضه .. ما ارتواش
وصبرت عمري اللي انقضى
وضاع سُدى
مستني إذنك بالدخول..
أو بالمثول ..
قدَّام عينيك الطيبين
اللي قضت ..
بالانتظار
حُكْم العيون..
عتمة مصير
مرهونة ..
بطلوع النهار ..
حكم العيون ..
واجب نفاذه
لو عَدَل ..
أو حتى جار
وانا ما امتلكش.. قصاد عيونك
اختيار ..
كل اللي ممكن املكه
إن انتظر..
وافضل أحنّ ..
ليوم ما جاش
أصل اللي فاضل من حياتي
بعته يا حبيتي ببلاش
وقبِلت أرهن لك
حنين قلبي ..
اللي طالع ع المعاش

 

 

اترك رد

لن يتم نشر عنوان بريدك الإلكتروني.