جريدة النجم الوطني
alnigm.com/gif2.gif

فيها إيه لو كنت تتأني ف قرارك بقلم:سمير السروجي

0 20

فيها إيه لو كنت تتأني ف قرارك

بقلم:سمير السروجي

شوية باميه أورديحي
ورز جنان
طبق سلطه بفجل أحمر
وشوربه بعضمه مخليه
وعيش ميري


وطبليه
ف حجر الصاله لمانا
مافيش لحمه هتتقسم
ولا دمعة هنزلها


عشان آخد مناب أختي
مفيش غير دمعة اخواتي
وانا بالبس عشان الحق
اشق جبيني للغيبه


ونظرة حزن عين امي
وكلمتها
بإن الشارع الجاحد هيخطفني
….
ياحيلة بطني
يامزوق جلاليبي
ده انا لسه يادوب هافرح
بريحة عرقك الليله


متخرجش ف صيام عضمي
ولو ناوي


ف مد ايديك علي خدي
ترطب لي مسام روحي
وبص بعينك القنديل علي شعري
هاحله لك


وطيب خاطر العزابات
بريق صادق ولو كداب
هنتصبر


بشمعة نصها مطفي
وخد م البيت
سنين جريك وتنطيطك
وفرحة عيني برجوعك
ولو مهزوم


خد مني السهر والنوم
وانا قلبي واكلني عليك
وخد من ضحكة اخواتك
قمر مقسوم


ولمتكم حواليا ف حواديتي
وغيرتي عليك


وانا بنشر غياراتك ف عز الليل
عشان ماتكونش سما صاحية
وخد من حق باب البيت
كالون صدا


لاانا هاقدر
أصوم تاني ولا اتوضا
ياعكازي


ياضحكة ريقي اللميه
ساواخد سكتي ديه


وراود همس شرياني علي الوحده
خلااص ناوي علي العفره؟!


لهو كان التراب ناقص
عشان يتزين بترياقك


بلااش تحلب عصافيري ف يوم هلكان
ولا تقطف جريد نخلي ف عديد نسوان
ده انازهقانه من شهقي علي صورتك


ولسه ف توبي كام قطعة مارفتهاش
وما أرتحتش من الخبطه علي صدري
ف يوم مارجعت لي بردان


كفاك عصيان
ياوارث نص منديلي
ونظرة جدك الزاهد
ياواهب قلبك المفطوم علي الحسره
لصحبة جوع


ومتغندر بشال بايت علي حبالي
يادوبي لسه باهد لك
لقيتك لافف السموات علي وسطك
ومتعايق


وفارش ضلك الطيب علي حيطاني
حواديتي هتتزين بعدودة
وكرمي اللي انت بتحايله


لاعاد يطرح ولا يضلل
ولا يحلي مرار جوفي
وتكعيبة عنب ساترة شبابيكنا
هتفضحها


وكحل اخواتك العزبات
هيتلخبط علي وشوشهم
وتوبي اللي انقسم نصين
علي سيرتك


وسجادة صلااه بايته علي القبله
مالمتهاش


هتسألني عن السجدة
اللي حوشها جبين شحات


وعن آيه ف ركعه يادوب
ما كملهاش
خروجك


عجز السموات عن المطرة
وكحلنا بشوف عاجز


وعودنا علي العتمه..وتنهيدنا
وزيينا بعياط الروح
خروجك


سلم الدفه لموج عاتي
وريح جيانا بالعنيه
وعود شمعنا يطفي


ويتمنع ف عز الليل
وهتعدد عليك


كل النجوم حتي
الخوالي بجفنها البكاي
وطلعة صبح


مش ناويه تعدي الشمس لجبين النهار
وبرق نشاف
ورعد عجاف
وسبورة


لاهي قابله طباشيرها
ولا ناويه تفسر جذر تربيعك
هادور ليه علي سيرتك؟


وانا شايفه وشوش اصحابك البايشه
بتتعايق بنهر دموع صليب تكسر


و…دايرة
بعيال الريف علي البندر
لميت شواشي النخل
وعيدان البنات


شبابيك بيوت علي بوابات
وحيطان يادوبها لسه بتلين
وقفت عشانك ف المدن


طوابير بيوت
وجيوش فصول
قلعت مرايلها المدارس


زفه خارجة من حيطان بيتنا اللي عجز
للميادين الإزاز
وكل ماتعدي ف ميدان
بينحني التمثال تحية


يبتدي الاسفلت يطرح
نبتة الشعر العفيه
شوق جنوني للهتاف


وزي ماتكون انت شايف
بوابات مصر القديمه..والخليفه


ابتهال ناس الغوريه ف الحسين
وضحكة الإنشاد ف حنجرة الياسين


دي ناس غريبه
ف كل ماتضيق عليهم و..يضحكوالها
يعشقوها


وانت منهم
والرقع بتزين ف توبك


فيها إيه
لو كنت تتأني ف قرارك
او تفاصل ف الرجوع.

اترك رد

لن يتم نشر عنوان بريدك الإلكتروني.