شهرزاد و شهريار…
بقلم / محمود بيومي
إللي بين مسرور وسيده
عهد موت والدم سايح
شهريار يؤمر عبيده
تصبح الأخبار فضايح
إقطعوا راس الصبايا
إقتلوا كل السبايا
واحكوا عني ميت حكاية
للي جّي وللي رايح
*
أول القصة الخيانة
شهريار عايش حزين
لسه حاسس بالمهانة
جرح عايش فيه سنين
قولّي إيه ذنب اللي ماتوا
واللي ضاعت يوم حياته
شهريار مع ذكرياته
بين عذابه والأنين
*
شهريار صوت المنايا
نفسه برضه فيوم يحب
كان بيقتل في الصبايا
بس جوا ضلوعه قلب
شهريار إنسان يا ناس
وارث القسوة وخلاص
شهرزاد شافت عيونه
طفل طيب قلبه ماس
*
لو حكيتي الليلة قصة
طوليها بألف خيط
بالجمال رصيها رصه
حنكة الواعي الحويط
شهريارك يا صبية
سلطته عالناس قوية
يأمر الناس والرعية
يحفروا القبر الغويط
*
شهرزاد جواها قلب
قالوا إنه جيش عواطف
شهريار سلّم بجد
ده اللي كان للعمر خاطف
من شغف همس الرواية
كل فجر الديك يأذن
ينعس العاشق يحنن
ينتظر باقى الحكاية
*
شهرزاد ست البنات
من رموشها سيف بيدبح
بالعيون الساحرات
خلت القاسي يسبّح
شهرزاد ست الجمال
بين حنانها والدلال
ألف ليلة يا صبية
بين غرامك والوصال
*
هي شهر وهو شهر
شهر قاسي وناوي غدر
هي شهر بيحكي قصة
ديك بيدن كل فجر
عدا شهر ومر شهر
طال مداها وزادها عُمر
خلى شهره هو أصبح
حب غالى بعد صبر
