حلم الصبايا

شعر / أحمد رأفت..

بنوتة خطت
فوق حيطان النجم..
غنواية حنان ..
فتحت بيبانها
ومررت..
كاس المحبة ع اللسان..
شبت..
وحبت..
وانطلق ليها الوليد بالحصان..
فارس..
بيحضن شمس بكرة..
تحت ضليلة أمان ..
ف عيونه ..
شافت حلمها النونو..
بيخرج للوجود..
فرحت ..
وقامت رشرشت..
شربات فرحها ..
ع الخدود ..
ودقدقت على هون هواها..
ودندنت على كل عود ..
اتلملمت كل الصبايا ..
واتجمع الاولاد شهود…
آدي ولد ..
وآدي صبية ..
وآدي فرحة ف العين متدارية ..
قلم المصاير..
لسه داير ..
عمال بيكتب قصة جاية ..
بنوتة قالت لابنها ..
آدي الحكاية يا أمير ..
بدأت بضحة وانتهت ..
بطفل نايم ع السرير