جريدة النجم الوطني
alnigm.com/gif2.gif

حروف الجن بقلم: وحيد علي الجمال

0 34

حروف الجن

بقلم: وحيد علي الجمال

أقلام شبيه الروح
حروف الجن
بقلم: وحيد علي الجمال

حروف الشعر جوايا
راكبها الجن
في وقت النوم بتتعفرت
وجنب القلب تتظفلط

وتجي تزن
أشوف الحرف متحفلط
وع القافية ومتظبط
بدل واحد بيبقى تونز
يميل ويطير على جروحي
تغني في الهوى روحي
وتبكي عينيا م الحسرة
على خدودي دموعي تئن
أجيب في البيت كذا معنى
وأنام وأحلم يجمَّعنا
نغم باللحن يتغندر ويتسلطن
على بحر الجمال بيرن
بقول تعويذة يظهرلي

ملاك الشعر وشيطانه
وأخبَّط فوق على حيطانه
وبعمل زار
ولو تاه الكلام مني
أجيب أسرار
وأحضَّر نشرة من دمي
بتحكي م الوجع أخبار
وأقوم شارد على نفسي
مفيش لهفة بتعصمني
وقلبي كتير بيرجُمني

ويسألني:
فاضلي شويه تكتبني
من الكفار
عصير صبار

ومارد فيك ملازمني
بينفخ نار
بشوفه جوه في النِّني
بينحت ع السطور أصنام
أنا عرَّاف على ديوانك
بنيت معبد لأحزانك وقداسك
ومستني أبوس تاني على راسك
وأعدي وسط حراسك

معايا صكوك بتغفر لي
مواسم لعنة الخذلان
صحيفة وحيك المزعوم
مهيش محفورة في كفك
ولا موشومة في دراعك
ولو حلم الرجوع ليكِ
رسالة ف قلبها تفسير
لاقيت صورة بتأشيرة
بإن الحكم في عينيكِ
أخد بطلان

مراجعة لغوية/ فريق شبيه الروح، تحت إشراف: أ. شيماء محمد أحمد

اترك رد

لن يتم نشر عنوان بريدك الإلكتروني.