جريدة النجم الوطني
alnigm.com/gif2.gif

بلغوا لأمي السلام

0 122

الشاعر رضا علي أحمد ابو شنب

 

 

لما حبيت اني اغني
شوقي خدني لحد امي
قلبي بيدق بقصيدة
والدموع بتفر مني
كنت عايش جوه منها
منها واخد كل دمي
مهما تسهر او تقاسي
او بتبكي جنب راسي
لما بفرح كانت تغني
لما تلقي القلب قاسي
او بغيب عنها وناسي
مهما بعمل شايله همي
روحي دايما بتناديها
قبل رمش العين ما يرجع
بتلاقيها
والدموع تجري في عنيا
وفي عنيها
جوه حضنك يا امه ضمي
امسحي بايدك دموعي
من حنانك سدي جوعي
وبشفايفك يالا سمي
انتي اول كلمه ينطقها لساني
زي حبك مش هلاقي حب تاني
ايوه امي ثم امي ثم امي
الرسول وصاني بيكي
قبل ابويا وقبل عمي
*********************
امي كانت هي شمسي
نورها يوهبني الحياة
هي يومي وهي امسي
نعمة من عند الاله
لما يعلي الموج علينا
جوه روحها بتدارينا
حضنها طوق النجاة
تنسي روحها وتفادينا
تبقي لينا كالسفينه
ترسي بينا في كل مينا
ربنا راضي في سماه

********************
امي كانت جوه بيتنا
حضن دافي للصغار
بتلاقيها قايمة بدري
لاجل ما تحضر فطار
علي الطابور دايما بتجري
جايبه في ايديها الخضار
لو يميل البيت علينا
سانده بايديها الجدار
او يطول الليل علينا
امي في عنيها النهار
في تعبنا حاسة بينا
قلبها زي الرادار
تحكي عنا وتحكي لينا
كل حواديت الصغار
تحكي عن سنة نبينا
لما وصي بكل جار
******************
اللي امه لسه عنده
يدعي ليها
امنا في الكون دي جنة
بينا ربنا مبتليها
لو هترجع تاني ليا
كنت اوطي وابوس ايديها
او اولع روحي شمعه
لاجل نظره من عنيها
ياللي رايحين للمقابر
بلغو لامي السلام
حبي ليها كان حقيقه
مش……… كلام
لو تغيب عني دقيقة
كنت اشوفها في المنام
نورها كان بيغطي عيني
قاعدة بتصلي القيام
كنت لما ااقول خديني
اقرا في عينها الكلام
وابتسامة حلوة منها
لسه بدري يابني نام
ياللي رايحين للمقابر
بلغو لامي السلام
بلغو لامي السلام

اترك رد

لن يتم نشر عنوان بريدك الإلكتروني.