جريدة النجم الوطني
alnigm.com/gif2.gif

الملجأ العربي..بقلم رضا أبوشنب

0 194


جريت علي اخويا اشكيله
وبجري عليه وانا خايف
بقوله يا اخويا انجدني
دا انا بعنيا مش شايف
تاخدني الموجه و تجبني
وانا علي الشط مش عارف
وترفع فيا وتسبني
واعيش فيها و انا مخالف
صبحت الصبح من بدري
بدور يومها علي ارضي
لاقيت الحبل في ايديهم
وكل الخلق دول ضدي
بيوفو بوعد مش وعدي
وانا لوحدي بشوف وعدي
وفين ياخواتي اراضيكم
وليه ياخواتي مش جنبي
بكيت والدمع في عنيا
بينزف دم علي خدي
صرخت وصرختي عدت
وقلت مسيرة هتعدي
دا انا اخواتي كتير لكن
في وقت الجد مش عندي
هحاول مرة اقنعهم
بان المجد مش مجدي
وان الرب هيعنهم
اذا ما وقفو يوم جنبي
مليش في الدنيا الاكم
وانتم اهلي وحبايبي
ولو تتخلو يوم عني
فانا بعفيكو من ذنبي
اخويا و قالي متخفشي
تروح ازاي وانا عايش
هحضر بس مركبتي
وهربط وسطي بالقايش
علشان المسجد الأقصى
انا الحارس وانا الفارس
هنعمل رحلة للاقصي
ونرجع ننده السايس
ورجعو اخواتي بالخيبة
وضاعت كل احلامي
وطلعت منهم العيبة
كرهت في يومها حكامي
وعملو في البلاد ملجأ
وجو الخيمة ورموني
وطول الوقت انا مصدق
بان اخواتي حبوني
ومش ممكن اكون بغرق
واشوف اخواتي يسبوني
دا لون الدم مش ازرق
وباين حتي من لوني
وليه في القدس نتفرق
وليه دايما تعايروني
وسيبتو الكل يتريق
وكنت اتمني تحموني
نسيتو الأصل والمبدأ
وفي الاخر تحاربوني
ولو ترموني في بحاركم
هشيلكم جوه في عيوني
دا انا منكم وانا العربي
انا فلسطيني في المنشا
بتاخدو الدنيا لحسابكم
وبفضل وحدي في الملجا
يارب الكون لمين هلجا
سابوني اخواتي في الملجا
في قلب الملجا العربي
فرغ صبري
ومن خيمة الي خيمة
فضلت اجري
سنين العمر بتعدي
ومات الطفل جوايا
بيرمو اللحم بايديهم
ويرموني بخساية
ونسيو حتي قرانهم
ونسيو السورة والآية
ونسيو حتي اخرتهم
وان الروس هتتساوا
انا يا اخواتي مش هندي
ولا عايز اكون غاندي
انا المقتول وبايديكم
في قلب الملجا العربي

اترك رد

لن يتم نشر عنوان بريدك الإلكتروني.