جريدة النجم الوطني
alnigm.com/gif2.gif

الأزمة..

0 91

بقلم / محمود بيومي

 

كمالة الهم والأزمة
ظهر موضوع مالوش لازمة
ماهي الأيام بقت سودا
وضاقت ضيقة الجزمة

وصلنا لدرجة ان احنا
بقينا ملطشة ولعبة
لأي حمار خسيس غدار
بيسرقنا فظروف صعبة

ده قوت الشعب يا جاحد
بطاطس يعني مش لحمة
تخزنها وتمنعها
بدون شفقة ولا رحمة

دي أكلة بسيطة ورخيصة
ياكلها فقير يقوم شبعان
ويحمد ربنا عليها
ويبقى فغاية الروقان

وجنب الاكل نقليها
عشان الطفل يتغذى
ولو فصنية نطبخها
بتبقى في منتهى اللذة

نلاقي لص يمنعها
عشان بكرا يغليها
وفِي مخازنه يخزنها
في سابع ارض يخفيها

ولو تسأل بقى المسئول
يقولك أزمة مقصودة
وراها اتنين من الاخوان
وبرضو بلدنا محسودة

وعالتوكشو تلاقي حوار
خبير بيحلل الموضوع
وكرشه يوزن القنطار
وعمره ماحس يوم بالجوع

ضميرك فين يا مستقوي
وفين دينك وايمانك
يا رب تجيلك البلوة
تعيش غارق في أحزانك

وليه يا حرامي تتجرأ
ومين ساندك ومين سيدك
ومين قاسم معاك قوتنا
إلهي تنقطع ايدك

اترك رد

لن يتم نشر عنوان بريدك الإلكتروني.