بقلم / عادل التعلب
لــــسه انا فاكـــر أول بصــــه دي اللي معــــاها بـــدأنا القصه
يوم م عنيكي رمتـــني بنظرة
وردت عيــــــــني عليها بهمسه
كان مكتوب في عــــنيا بحبك وانـــتي عيونك شايفه وحاسه
خفت ساعتها أقـــولك إني ؟!
خفــت تضيع من إيدي الفرصه
صوتي اتكعبل شـــــد لساني نطقت عــــــيني هوا انا خرسه
انا ها تكلــــم عـــــني وعنك
اسكــــــت انت دورك لســــه
بعتـــت عيني رسالة لعــينك
كان مكتوب جواها مخــالصه
يعني تــــنازل مني انا ليكي عن ملكـــــــية قلـبي الخـاصه
بكل إرادتي وكامل وعـــيي
ولا في مزاد ولا أي منـاقصه
أصبح قلــــــبي ملك إيديكي أحكمــي فيه بلا أي منافســــه
بس اتحـــري العدل في حبك
وخلي الحكـــم لآخـر الجـلسه
أيا كان الحكـــم انا هارضي
إلا البعـــــد …بُعـــدك كـارثه
عارفـــــه حبيبتي ..أنا تلميذ
جاي لعنــــــيكي ياخد حـصه
أصل عنــــيكي مؤشر حبي
طالع نازل زي الـــبورصه
أسهم حبي في قلبي بتــــعلا
لما ببص في عـينك بصــه
بملك كل الدنيا في إيــــــدي
لما انـــــا بلمس إيدك لمسه
والله في حبك انا مش عارف
شغل مُحـــب دا ولا أبـالسه
بيحاســـبوني عليكي يقولوا أيه راح تاخده ياعم ماتنـسى
ما انا لو بيدي كـنت نسيت
والنسيان راح يبقي الرخـصه
بس ازاي وحبيبتي الروح
أنا من غيرها دنيتي خالــصه
ببقي في بعدها طير مدبوح
عمال يرقص آخـــر رقــصه
كنت بنازع وانا بين ايدك
بس عنيكي ادتــني الفــرصه
انتي وقفتي قصادي دقايق
واحدة اتنين يمكن خــمسه
لكن كل دقيقه تســــــــاوي
عمر بحاله نهايته المــرسى
أنا من غيرك شفــت الدنـيا
تشبه قبـــر مــداري الجـــثه
يعني انا كنت في بعدك ميت
لكن عشت مع أول بــــصه
