” أنا المصري” بقلم الشاعر/ أحمد رأفت
……
أنا المصري اللي عمره ما طاطا يوم راسه
لأي عويل
أنا المربوط في شجرة عشق دوَّارة
في أرض النيل
ساعات بصبر على المحتل والغاصب
وصبري جميل
لكن في الصبر.. ليا حدود
صحيح شاعر
وشعري كتير بيتغنى
لكن في الشعر تلقاني ..
برش بارود
فأوعى يغرَّك المنظر
فتتمنظر
وتتدلع .. وتتغندر
وتتجبر على الغلبان
وأوعى يغرَّك الطيبة
ولا كرم الضيافة يا (مان)
ده يوم ما تدوس على ناسي
هتلقى طوفان
هتلقى طوفاااان
طوفان يمحي تاريخ أوطانك الساكنة
في أي كيان
هخليك في التاريخ عبرة
لأي جبان
نسي نفسه .. وكان نفسه ..
يشوف أرض الكنانة زمان
فشاف الويل على ايدي
أنا المصري
*********
أنا المصري اللي مهما طال عليه الليل
يجيله نهار
على جمر الصعاب ماشي
ومش بنهار
وسر وجودي بالمصري ف بير مقفول
ملهش قرار
فما تغلّبش يوم نفسك عشان تعرف
وبص وشوف …..
أنا شاعر حياتي نضال
سلاحي كلمتين في الحق ..
ببدُرهم .. ف بحر خيال
على صهوة حصان قولي
بكون خيَّال
وادور بين البلاد .. رحَّال
أعطَّر بالغُنا بابل
وبزرع في اليمن موَّال
وبرسم فوق تراب غزة
مواكب فرح للأطفال
بعيش مؤمن
بإن المُر لو طوّل مسيره يمر
وإن الحر مهما يغيب ورا القضبان
هيفضل حر
مسيره الحي يتلاقي
ونلقى قلوبنا مشاقة
نروح الأقصى ونكبَّر
وننسى المر
وننسى المر